یہ ہماری محترمہ اماں جان رشتہ میں اعلیٰ حضرت قبلہ کی پھوپھی زادی تھیں،صوم و صلوٰۃ کی سختی سے پابند تھیں، نہایت خوش اخلاق، بڑی سیر چشم،انتہائی مہمان نواز ، نہایت متین و سنجیدہ بی بی تھیں ۔
اعلیٰ حضرت قبلہ کے یہاں مہمانوں کی بڑی آمد رہتی تھی ، ایسا بھی ہوا ہے کہ عین کھانے کے وقت ریل سے مہمان اتر آئے اور جو کچھ کھانا پکنا تھا وہ سب پک چکا تھا، اب پکانے والیوں نے ناک بھوں سمیٹی ، آپ نے فوراً مہمانوں کیلئے کھانا اُتار کر باہر بھیج دیا اور سارے گھر کیلئے دال چاول یا کھچڑی پکنے کو رکھوا دی گئی کہ اس کا پکنا کوئی دشوار کام نہ تھا، جب تک مہمانوں نے باہر کھانا کھایا گھر والوں کیلئے کھانا تیار ہوگیا، کسی کو کانوں کان خبر بھی نہ ہوئی کہ کیا ہوا۔
اعلی حضرت قبلہ کی ضروری خدمات وہ اپنے ہاتھ سے انجام دیتی تھیں، خصوصا اعلیٰ حضرت کے سر میں تیل ملنا یہ اُنکا روز مرہ کا کام تھا، جسمیں کم و بیش آدھا گھنٹہ کھڑا رہنا پڑتا تھا اور اس شان سے تیل جزب کیا جاتا تھا کہ اُن کے لکھنے میں اصلا فرق نہ پڑے،یہ عمل اُن کا روزانہ مسلسل تا حیاتِ اعلیٰ حضرت برابر جاری رہا۔
سارے گھر کا نظم اور مہمان نوازی کا عظیم بار بڑی خاموشی اور صبر استقلال سے برداشت کر گئیں، اعلیٰ حضرت قبلہ کے وصال کے بعد بھی کئی سال زندہ رہیں مگر اب بجز یاد الٰہی اُنہیں اور کوئی کام نہیں رہا تھا۔
اعلیٰ حضرت قبلہ کے گھر کیلئے اُن کا انتخاب بڑا کامیاب تھا، رب العزت نے اعلیٰ حضرت قبلہ کی دینی خدمات کیلئے جو آسانیاں عطا فرمائی تھیں اُن آسانیوں میں ایک بڑی چیز امی جان کی ذاتِ گرامی تھی۔
قرآن پاک میں رب العزت نے اپنے بندوں کو دعائیں اور مناجاتیں بھی عطا فرمائی ہیں تاکہ بندوں کو اپنے رب سے مانگنے کا سلیقہ آجائے،اُن میں سے ایک دعا یہ بھی ہے: "ربنا آتنا فی الدنیا حسنۃ وفی الآخرۃ حسنۃ وقنا عذاب النار" ترجمہ:اے ہمارے پرورگار! ہمیں دنیا میں بھلائی دے اور آخرت میں بھلائی دے اور جہنم کے عذاب سے بچا"۔
تودنیا کی بھلائی"سے بعض مفسرین نے ایک پاک دامن ہمدرد اور شوہر کی جاں نثار بیوی مراد لی ہے، ہماری اما جان عمر بھر اس دعا کا پورا اثر معلوم ہوتی رہیں۔اپنے ، دیوروں اور نندوں کی اولاد سے بھی اپنے بچوں جیسی محبت فرماتی تھیں، گھرانے کے اکثر بچے اُنہیں اماں جان ہی کہتے تھے، اب کہاں ایسی پاک ہستیاں۔رحمۃ اللہ تعالیٰ علیھا و اعلیٰ بعلھا و ابنیھا ۔
📝 ماخوذ از: عقائد و کلام
کوئی تبصرے نہیں:
ایک تبصرہ شائع کریں